على غير العادة

بوست رياضى .. جديدة فى المدونة بس ايه بيحصل اليومين دول مش جديد ؟

مفاجأة جديدة من المنتخب .. انا مش مصدق

تريكة وزيدان وفتحى وشوقى ومعوض وحمص نازلين تلطيش زيى ما انتوا شايفين فوق كده والحمد لله سايبين الحيطان من امثال وائل جمعة ورا عشان مناخدش الختم بردو يعنى :)

مش عادتى انى افضى نفسى واتفرج على كورة بس دلوقتى بشجع وبتفرج والجديد بقى انى بقيت بنفعل مع الماتش وتقريبا بشوط اللى جنبى مع اول هجمتين :)

يلا يا رجالة مصر كلها بتشجع .. فى انتظار الصعود النهارده ان شاء الله بعد مباريتين ربنا يعديهم على خير

مصر VS امريكا
ايطاليا VS البرازيل

البرازيل : 6 نقط وفرق اهدافها 4
ايطاليا : 3 نقط وفرق اهدافها 2
مصر : 3 نقط وملهاش فرق اهداف
امريكا : ودى ملهاش نقط وفرق اجوانها سالب حبة كده تقريبا -5

ربنا يكرمنا النهارده كده ب 15 جون فى امريكا .. فرق الاهداف هيبقى مهم اووووى فى حال ان ايطاليا تغلب البرازيل

بدعى مع كل جمهور مصر

يااااااااااااارب

الباب مفتوح

الباب مفتوح لكل اللى مش عاوز يفهم ..الباب مفتوح لكل اللى مش عاوز يقدر يمكن اه تعبان شوية وبتشد منكرش ده قصرت كتير فى حق اصحابىوبردو مقدرش انى انكر ده .. وبعتذر كمان وده اقل حقوقكم عليا بس لازم تعرفوا انى دلوقتى تحملت مسئولية اكبر مما اتحمل وفترة انتقالية فجأة احداثها كتير وكلها احداث مهمة وفجأة انتقال من مرحلة لمرحلة تانية خالص

بعد اللى حصل فى الفترة اللى فاتت دى ..

فيه اللى فهم وقدرنى

وفيه اللى ساعدنى

وفيه اللى زعل وضغط عليا اكتر مما اتحمل

منهم اللى قرر يبيع وده براحته

الباب مفتوح

قررت اخيرا انى مش هتحمل اكتر من كده ... اللى هيقدر اهلا وسهلا

واللى مش هيقدر

ف (الباب مفتوح )

صباح التهييس

صباح التهييس يا معلم

ابتسامة لما مضى

ربما حان الوقت لنعود بذلك القطار المتهالك ما يقارب الخمسة أعوام وأعيد الصورة من جديد ربنا أرى ما لم أراه مسبقاً .. فلأبدأ رحلتي وأنا على موعد مع عالمي السابق .. فلأغفو قليلاً في دفئ هذا القطار قبل أن أصل على ذلك العالم الذي لم أعد اذكر ثناياه ولا اذكر له إلا ظلاماً وبرودة يرتعد لها جسدي كله لمجرد تذكرها ..

وها قد مر هذا القطار سريعا ما بين لحظات حياتي ليعود إلى حيث أردت ... نفس المشاهد كما تركتها وكأنها دفنت في خيالي منذ زمن بعيد ولم اعلم عن وجودها شئ .. ها انا ذلك الطالب في المرحلة الثانوية الذي لا يملك في الحياة إلا لهوه على رمال البحر وحيداً وكثيراُ من مسائل الرياضيات التي يتلذذ بفك ألغازها الواحد تلو الأخر

أرى الآن نظرتي على كل من حولي وتفكيري الذي لم يدرك حينها أن الحياة أكبر من منظوره الذي ينظر به على جزء ضئيل من تكوين هذا العالم ويظن أنه رأى أعماق الكون وتغلغل فى جوانبه ... عفواً لم تكن ابتسامة بل هي ضحكة ساخرة على تلك المهاترات التي أقحمت نفسي فيها .. عن كل تلك اللحظات التي مرت دون ان اعلم لها جدوى ... حقا يا له من يوم غير تقليدي ها أنا ذلك الشخص الذي يضحك فرحاً وها أنا ذلك الشخص الذي تعلو وجهة ابتسامة كونها الألم والحسرة والاستهزاء .

ابتسامة لكل السادة القضاة الذين ولوا أنفسهم وأصدروا الحكم غيابياً ... تحية وإجلالاً منى فهذا الصبي كان يستمتع بطفولته التي لم يدرك غيرها بينما تحكمون عليه أحكاما وهمية هي من نسج خيالكم ولإرضاء نفوسكم .. فلتقفوا أقوياء ولتعتقدوا إنكم معصومين من الخطأ فلتنظروا كما يحلوا لكم ولكن اعلموا أن هذا الطفل الصغير يرى أخطائكم وينظر لها بإشفاق أكثر مما نظرتم كما يعلم أن نفوسكم الضعيفة ستأبى الاعتراف بخطأها

فلأسدل تلك الستائر السوداء على ما مر .. فانا اعلم تماماً إني سأستيقظ الآن وقد بدأت عهداً جديداً ومرحلة أقوى من سابقتها ..

هابى زلانطين من جديد

زيى المرة اللى فاتت نازل فى امانه الله رايح مكتب الجريدة اللى بتدرب فيها على التلاتينى ... وخير اللهم اجعله خير البلد كانت احمر فى احمر ولا مدرجات الاهلى فى استاد القاهرة لما تلاقى مفيش غير خمسة سته زملكاوية اللى على جنب كده مش لابسين احمر ... قولت خير حصل ايه فى البلد ؟ فجأة بقت بتحب النادى الأهلى ؟

لا لا لاااااا مش دى مصر اللى انا اعرفها ولا دى بورسعيد اللى انا اعرفها .. خير حصل ايه فى البلد ؟ وطبعا مكنتش محتاج افكر كتير المرة دى عشان افتكراننا فى شهر اتنين و ان الزلانطين قرب والدباديب الحمرا مالية البلد وطبعا الاسعار كالعاده بارقام فلكية ... وكالعاده منظر الشاب اللى جايب اتنين ومتقوليش انها لمراته وحماته قولنا قبل كده بلاش حسن النية :)

وكعادة كل مرة مش هعكر صفو الزلانطين السعيد ... بس عيب اوى اللى البلد وصلتله ... انا بحتج بشدة وبطلع شرار و بعلن من هنا معارضتى للزلانطين وللتفاهة اللى وصلنالها ... بجد شكلنا يكسف ... اعتبروه بقى كلام ناس معقدين اعتبروه كلام شاب عايش فى العشرينات اعتبروه زيى ما تعتبروه بس انا مقتنع باللى بقوله :)

تعرف ايه عن المنطق ؟

ولما نسأل سؤالنا التقليدى ونقول : تعرف ايه عن المنطق ؟
.
تبقى بجد نفسك تسمع اجابة بهجت الاباصيرى المعتادة بس حاجات كتير تمنع انك تقول الاجابة الاسهل
.
احيانا المنطق هو أصعب ما يمكن ادراكه. واختلفت تعاريف المنطق فممكن نقول ان المنطق هو نهاية كل حلم .وقد لا يدرك صاحب الحلم ان النهاية قد تخالف ما يتمناه ولكنها فلسفة المنطق التى لا تقبل الا واقع قد لا ترضاه ..
.

.

تعرفوا ؟

.

بدأت افكر ان بهجت الأباصيرى كان يعرف المنطق

.

بس رافض وجوده

.

تفتكر تحب تكون منطقى ؟

.

ولا تكون بهجت الأباصيرى ؟

.

==============

تحديث ضرورى : بما انى من هواة المسرح والتراث المسرحى فعيب اوى لما انسى ان اللى اتسأل السؤال مرسى الزناتى ومش بهجت الأباصيرى:) ... بس بردو هسيبها بهجت لانه رمز اوضح للى انا عاوز اقوله :)

بره الخط الفاصل

.

بره الحد الفاصل

.
بره الحد الفاصل ضحكة

.
ضحكة بتلمس جوه بعمق

.
مش عارف من مين ولمين ؟

.
بس حاسسها نور فى طريق

.
مش ضحكة دى حياة ومعانى

.
لما الحد الفاصل يقع

.
نبقى بنحلم حلم جميل

.
لما بتنسى الواقع تجرى

.
لما تشوف الدنيا دى وردى

.
تبقى بتلمس مية احساس

.
وتحس بوجود الناس

.
مش فاهم على اساس

.
احط الحد الفاصل تانى ؟