تعرف ايه عن المنطق ؟

ولما نسأل سؤالنا التقليدى ونقول : تعرف ايه عن المنطق ؟
.
تبقى بجد نفسك تسمع اجابة بهجت الاباصيرى المعتادة بس حاجات كتير تمنع انك تقول الاجابة الاسهل
.
احيانا المنطق هو أصعب ما يمكن ادراكه. واختلفت تعاريف المنطق فممكن نقول ان المنطق هو نهاية كل حلم .وقد لا يدرك صاحب الحلم ان النهاية قد تخالف ما يتمناه ولكنها فلسفة المنطق التى لا تقبل الا واقع قد لا ترضاه ..
.

.

تعرفوا ؟

.

بدأت افكر ان بهجت الأباصيرى كان يعرف المنطق

.

بس رافض وجوده

.

تفتكر تحب تكون منطقى ؟

.

ولا تكون بهجت الأباصيرى ؟

.

==============

تحديث ضرورى : بما انى من هواة المسرح والتراث المسرحى فعيب اوى لما انسى ان اللى اتسأل السؤال مرسى الزناتى ومش بهجت الأباصيرى:) ... بس بردو هسيبها بهجت لانه رمز اوضح للى انا عاوز اقوله :)

بره الخط الفاصل

.

بره الحد الفاصل

.
بره الحد الفاصل ضحكة

.
ضحكة بتلمس جوه بعمق

.
مش عارف من مين ولمين ؟

.
بس حاسسها نور فى طريق

.
مش ضحكة دى حياة ومعانى

.
لما الحد الفاصل يقع

.
نبقى بنحلم حلم جميل

.
لما بتنسى الواقع تجرى

.
لما تشوف الدنيا دى وردى

.
تبقى بتلمس مية احساس

.
وتحس بوجود الناس

.
مش فاهم على اساس

.
احط الحد الفاصل تانى ؟

الحياة من وجهة نظر مسرحية

وما الدنيا الا مسرح كبير ... مسرح بنعيشه والشاطر اللى بيتعايش جواه .. وجواه دى حكاية تانية وقواعد تانية غير قواعدنا اللى نعرفها تلاقي جوة حياتك حياة و100 قصة وحدوتة تحكيها وتقول كان ياما كان .. بس النهارده القصة مختلفة ..القصة دى مش محفوظة القصة النهارده لا اتكتبت ولا ليها قاعدة غير انك بنى آدم ومتقلقش ممكن لو القاعدة دى ضايقتك ممكن تتناساها طول مدة العرض.

.

.

هدوء أيها السادة الأفاضل سيبدأ العرض
.
هدوء تام ويفتح الستار

.

.

المشهد الأول : يقف البطل وحيداً وسط جمع من الناس يكفى لتغيير حياته إلى عرضاً صاخباً يزيد من وحدته أضعافاً .... لا يدرى كم من الوقت مر عليه وهو يتلمس الناس بعينيه ويحاول استشعار وجودهم والناس مارة لا يشعر أحداً بوجوده وكأنه طيفاً تكون من انعكاس ضوء مصباح غرفته الصغيرة التى تمتد فيها رؤاه الى حيث لا يدرى لها منتهى .. فيجلس ساكناً يدندن لحناً قديماً طالما تغنى به عندما كان صغيراً.

.

.

المشهد الثاني : ها قد انتهت ألحانه وهو جالس فى مكانه وقد انتصف الليل و خوى الشارع من المارة تقريبا ً الا من يجد في السير للعودة إلى بيته مرهقاً من يوم عمل طويل .. نظرة عميقة إلى كل حجر رسمه حبه على جدران تلك البيوت العتيقة .. نظرة إلى البطل تكفى لنرى ابتسامته التي يشوبها من الأسى ما يكفى أن يثقل كاهل من الفتية ألافاً .. عفواً هل ما نسمعه هو نبض قلبه ؟ أم هو قرع طبول جيشاً بعث من الأزمنة الغابرة ... وأخيرا ينطلق صوته ضعيفاً منادياً على استحياء ولا من مجيب .. فيرفع من صوته ليصل إلى أركان المدينة ولم ينظر له أحداً .

.

.
المشهد الثالث : ينظر البطل إلى السماء متأملاً النجوم التي افترشتها ويتأمل الطرق التى رسمتها ويحفظها عن ظهر قلب .... تماماً كما هي مازالت ترسم فى خياله ألافاً من لوحات أحلامه ... تعود به الى ذكريات كاد أن ينساها ترسم له مملكته التى بناها ذهباً خالصاً وظن فيها الدوام وقصوره التي ظنها من المتانة ما تكفى أن تضاهى الجبال .. ولما لا ؟ ولما لا وقد تفانى فى صنعها ؟ ولما لا وقد أسسها بكل ما امتلك من احساس كما ريشة فنان تنسدل على لوحاته ؟ ... تذكر ليلاً طويلاً سهره ليجمع من النجوم ما انبثق من قلب السماء فينير به طرقات مدينته فيزيدها جمالاً .. يا لها من لوحة فنية رائعة ويا ليته كان يدرى ان لها قواعد من زجاج .

.

.
المشهد الرابع : يعود البطل إلى أرض الواقع وتتلاشى من حوله القصور لتظهر البيوت العتيقة مرة أخرى ... ينظر إلى المكان الذي احتوى أحلامه والى الجدران التى ارتسم عليها شبح ابتسامة لمن عاش يوماً مكانه وظن انه أقوى من جدران هذا المكان .. يجلس مستكيناً من جديد وقد أرهقه حلمه الذي طالما تمناه .. ولكن هذه المرة يعرف انه في يوم من الأيام سوف يبتسم لجدران هذا المكان متذكراً ضوء مصباح وغرفته الخشبية القديمة التي تهالكت من محاولاته .

.

.

تنتهي المسرحية يعقبها تصفيق حار
.

وتمنى البطل حينها أنه كان مشاهداً

.
ولم يكن بطلاً

وداعاً حقبة الذكريات

فى غيابك انا بجد مفتقد ذكرياتنا مع بعض

.

ذكريات كتير منها الجد

.

ومنها اللى ضحكنا فيه من القلب

.

كان متبقى منها جزء كبير بوجودك بعد سفر جودة

.

والنهارده بقول : وداعاً حقبة الذكريات

.

القاك على خير ان شاء الله

وتروح وترجعولنا بالسلامة انتوا الاتنين

.

ملحوظة :هيوحشنى بحر بورفؤاد وصيد الكابوريا... هتلاقى مين الكابوريا تعضه وتبهدله ؟

.

ملحوظة تانية : تم تغيير اسم الحزب الى حزب التجمع السعودى :)ويارب اشوفكم هناك ان شاء الله واحصلكم :)

هابى زلانطين

النهارده نازل بكل براءة رايح مشوار واتفاجأ ان البلد كلها حمرا طبق الاصل مدرجات النادى الاهلى !!!
.
قولت افتكر ماتش الاهلى والقطن امتى ؟ ممكن يكون النهارده والواحد نسى فى الزحمة؟ ...لا الاهلى ملوش دعوة .. البلد فيها حاجه غريبة وتتحول بورسعيد الخضراء بلد المقاومة الشعبية والنادى المصرى الى اللون الاحمر فجأة كده ..وبعد مكالمة قصيرة مع احد الاصدقاء حكستله فيها فقالى ان الزلانطين فاضل عليه 4 ايام .. ايوة ايوة الزلانطين هما كل سنه بيعملوا كده
.
وطول ما انتا ماشى دباديب حمرا والهدوم حمرا والاحمر منهم البشر اللى واقفة بتشترى.. بجد غريب الدبدوب الاحمر ده !! يعنى هو لازم يبقى احمر ؟ طيب كل الالوان كويسة وحلوة وبنت ناس والاحمر ده شكله مش حلو اصلا .. طلبت باحمر يعنى ؟ ... وطبيعى مش لازم اقول عشان الكل يعرف ان اسعار الباديهات الحمرا اليومين دول غير مسموح فيها بالفصال نهائياً ... وبدافع الفضول دخلت محل من المحلات قولت اعرف الاسعار واخدت رقم رشق فى دماغى ... نعم يا اخويا ؟؟؟ كنت عاوز اطبق فى زمارة رقبته .. الحاجات دى تكاليف انتاجها ميجيبش 1/16 من تمنها اللى اتقالى !! وفى القاهرة الحاجات دى باقل من ربع التمن اللى قالهولى !!!
.
لا واجمد حاجه لما تلاقى شاب خفيف شارى هديتين ...بلاش حسن النية وحد يقولى انها لمراته وحماته :) .. المخطوبين مبيجبوش الكلام ده نظرا لضعف الامكانيات والمتجوزين فى الزلنطين متسمعش البيت غير مارشات عسكرية وقرآن حداداً على اللى راح :)
.
وبعدين اعدى من ادام احدى محلات الهدايا تلاقيه ولا الاتوبيس .. خير اللهم اجعله خير يظهر ان اهل البلد كلهم بيحبوا بعض !! ربنا يوطد علاقتهم كمان وكمان :) وتلاقى البلد تفوح منها كمية برفانات رهيبة اول مرة بلدنا تبقى ريحتها حلوة كده
.
وبعدين انا مش فاكر هما اخترعوه امتى بصراحة العيد ده ؟.. انا لما كنت اسأل احنا لينا كام عيد ؟ كانوا يقولولى عيد الاضحى والفطر و6 اكتوبر وتحرير سينا و 23ديسمبر ... محدش بلغنى بيه ازاى ده ؟ احنا لازم نشتكى ضعف المقرارات :)
.
وعلى النقيض وانا بكمل مسيرتى البائسة وحواجبى مرفوعة فوقى بمترين اشوف واحد ربنا يشفيه يارب قاعد ادام جامع التوفيقى والرد عليه من كل حد يعدى جنبه (ربنا يديك يا حاج ) قولت لا لازم افهم وقفت ابص من بعيد والموقف اتكرر ادامى بتاع 150 مرة ... طيب يا عم انتا وهو ما انتا لسه دافع 60 ولا 70 جنيه فى هدية خليهم 71 ولا يعنى هى بتقفش على الغلبان ؟؟
.
عاوز اقول كلام كتير بس مش عاوزين نعكر صفو الزلانطين السعيد .. مش هقول غير ربنا يستر بجد

ها قد عاد صبياً

فى الطفولة كان يخشى كثيرا غروب الشمس

.
كان يخشى اختفائها بعد ظهورها

.
ولكنه كان يعلم انها سوف تشرق مجدداً

.
واليوم ها قد عاد صبياً

.
يخشى غروب الشمس بعد شروقها

.
يخشى أن يدرك أنها شمس

.
فيكون إيذاناً لها بالغروب

.
وتمنى أن يظل صبياً

.
ولم يدرك أنها لن تشرق إلا مرة واحدة

كفاية

يعنى اللى مش هيشوف انها اتملت

.

اكيد هيحس

.

ولما يحس لاما يمتص جزء من وجودها

.

لاما يسيبها شوية واكيد هتتبخر

.

ملحوظة متميزة وعبقرية : البوست مش تبع حملات ترشيد استهلاك المياه

كل سنه وانتوا طيبين

كل سنه وانتوا طيبين

.

كل سنه وكل اصحابى اللى بحبهم بخير

.

وضحكاتهم منورة وشوشهم ومنورانى

.

كل سنه وانا بخير

.

نيابة عن كل اللى مقلهاش

.

كل سنه واحنا كلنا اقرب لربنا

.

وربنا يعينا ويثبتنا

.

الشيطان خد افراج النهارده

.

ويظهر من المظهر العام انه آخد إفراج بكفاءة

.

صبرنا يارب :)

.

.

تسؤلات مهيسة على الهامش :

.

هو ليه النهارده بعد الصلاة ملقتش حد بيدبح ؟

.

محدش يعرفلنا الدولسى بيكسب السنة دى ولا لأ ؟

.

اصله حتى لما بيكسب

.

بيكسب مع كل الناس انما انا لأ :)

أهم الانباء

1) مصرع 7 واصابة اخرون فى انفجار برمبرمبو مشع بعد انفلات غطاء الحلة التيفال الذرى مما أدى الى العديد من الاصابات أسفرت عن امتلاء المستشفيات المجاورة للحادث هذا وقد تم التحفظ على البرمبرمبو كأحد الاسلحة البيولوجية الممنوعة دولياً ولم تعلن اى جهة مسئوليتها عن تصنيع السلاح ... هذا وقد اعلنت وزارة الداخلية عن بدء حملات لمكافحة ارهاب الاسلحة البيولوجية عن طريق العديد من الخطوات بدءاً بمنع تداول التونة الى الاسواق كما ارتفع سعر البطاطس اليوم الى 3 جنيه ونص كخطوة اولى لتقليل استخدامه فى تصنيع السلاح

2) اصابة ال 7 اللى ماتوا الخبر اللى فات بجنون وتحويلهم الى مستشفى الامراض العقلية بعد ان زعموا انهم يروا كل الناس فى هيئة دجاج وقد حذر المسئولون عن احتمالية اصابتهم بانفلونزا الطيور وخاصة بعد ان بدأوا فى الصياح مثل الدجاج ... كما انتحل احدهم شخصية احدى الدجاجات المهمة وجارى النظر فى انتمائه لاحدى قواعد الدجاج السرية

3) كشف أمر المدعو دادود افندى بعد ان كان يزعم انتمائه لطبقة البشوات وقد تحركت قوة مسلحة لكشف أسرار حياته فى صنيته المعهودة وقد تم العثور على طربوشه مما يدل على انه ( افندى ) وقد تم التعامل معه وربنا يخليلنا القطط

4) العثور على كائن غريب بحوزة احد المواطنين وتحفظ وزارة الصحة عليه لحين كشف اسراره ويدل التقرير الاولى على انه كائن غريب متناسق القوام لا يمكن فصل اجزاءه عن بعضها حتى بالألات الحادة مما يصعب عملية فهم مكوناته الداخلية هذا وقد أصر المواطن على انه مجرد جلاش ولكن لم تجد وزارة الصحة ما يدل عن انتماء هذا الكائن لفئة الجلاش مما أدى الى احالة المواطن للكشف على قواه العقلية

5) العثور على طبق غريب الشكل يعتقد العلماء انه طبق طائر مع تأكيد المواطن اللذى وجد بجواره على انه طبق جيلى برئ ويبدو ان سكان الكوكب الذى اتى منه الطبق قد قاموا بدراسة عينة من الهنود ولذلك يظنون أهل كوكب الارض ليسوا قادرين على تمييز الاطباق الطائرة عن اطباق الجيلى ..هذا ولم يتم دراسة اثر الطبق على أى من سكان المنطقة فى ظل غيابهم التام عن الرد عن أى اسئلة مع وجود نظرة غباء واضحة ... هذا وسوف نوافيكم بالتفاصيل


6) وفى ظل هذه الاحداث الغريبة نتسأل اى من الاحداث الخفية يحدث فى بورسعيد ؟ اهو تمهيد لغزو فضائى ام هى حربا قد قامت فى ظل غياب الحكومة عن متابعة الاحداث ؟ ام قد انتقلت بنا الاحداث الى قلب شيكاغو لنرى من الجريمة الواناً واشكالاً ومن الاسلحة ما لم نرى من قبل ؟

مراسلكم شيكو من قلب الاحداث .. بورسعيد

وسمعنى سلام اوعى وشك :)

مطر من جديد

الشتا رجع من جديد

.

وساب نقطه تحفر جوايا حكاوى السنه الجديدة

.

وهناك تحت المطر رجعت انطلق تانى

.

واستنى المطر يملانى طاقة ونشاط

.

وانط وامسك نقط المطر

.

وادندن اغنية قديمة تحت المطر

.

واحس بقوة الطبيعة جوايا

.

بجد وحشتنى

يوووم مش طبيعى

مع انطلاقة وقفزة عالية

مش عالية اوى آد ما هى كانت كفاية

كانت تكفى جدا انى اشعر بالهوا القوى قبل ما المس الارض

عودة للارض تانى من جديد

موج بيخبط فى الشط يهزه ويهزنى

هوا قوى بيطيرنى ومع ذلك مش متضايق

سبته يحركنى زيى المركب الشراعى

البحر فاضى بعد الفطار وكأنه بتاعى

احساس قوى بالارتياح

قطعه صوت صعيدى : بطن الجبل تتحدى الدجل :)


متستغربوش ده احمد ( Cello ) صديق الكفاح

يعنى مش من زمان اوى حسبة 14 سنه من ال 20 اللى املكهم :)

كان معايا وقتها مستمتع بكل لحظة زييى بالظبط

وطبعا لا يخفى عليكم وجود احمد سامى

وطبعا اذا ذكر احمد سامى ذكرت التصرفات الغريبة والنت

بس سيطرنا عليه والحمد لله

وبسرعة كنا عند مساحة من الرملة الناعمة

وعشان خاطرى بلاش حد يسأل الرمل ده جه منين ؟


بدأنا نكتب مسيدجات لكل اللى هيقراها بعدنا

والجميل اننا نسينا اننا كبرنا

وكملنا ضحك ولعب بعقل شاب

وقلب طفل صغير

احيانا فى حياتك بتتصادف بالوقت والمكان الصح بدون ما تخطط لوجودك فى المكان ده ولا فى التوقيت ده ودى مرة من المرات اللى يحصل فيها ده ورغم انى انا وتشيلو فرجنا علينا الشارع عشان يقنعنى اصحى وانزل وانا مكنتش نايم قبلها كويس وهروح الشغل تانى بالليل بس اليوم طلع يخفى اكثر مما كنا نتوقع وعشان كده : تشكر يا عم تشيلو ع اليوم الجامد

تخاريف

.

وما هى فى النهاية إلا غيوم

القمر

فى هدوء الليل وصمته الممتد

وجدته متطلعاً فى فضول

ينظر من نافذة غرفتى الصغيرة

تبسمت فابتسم ابتسامته الهادئة فى خجل

ومع أولى نظراتى اليه

أدركت انه يشبهها كثيراً

له بريقاً يشبه ما لعينيها من بريق

له سحر مثل سحر همسها الدافئ العميق

له مثل نعومة ضياها

وألاف النظرات الهادئة

إنه يشبهها كثيراً

هل يدرى ما له من سحرها ؟

ملحوظة : البوست مستوحى بالكامل من لعبة قمرية كنت بلعبها ليلة 13 رمضان يعنى القمر كان شبه مكتمل ..هحكى تفاصيل اللعبة قريب جداا ان شاء الله بس مؤقتا كنت يومها فى موقف مماثل للصورة تماماً :)

فى رحلتى للبحث عنى

.

تائهٌ ما بين متناقضات الموجود واللاموجود

.

هيهيهيهيهييييييئ شوووووووفت بركات ؟

الفيديو عبارة عن تعليق على ماتش للأهلى والزماالك

الفكرة مش كروية بالمرة

الفكرة أن عمرو آديب كبير مشجعى الزمالك

وده واضح طبعا من نسبة الضغط والسكر عنده

وطبعا كالعاده نتيجة الماتش متوقعة

ويخسر الزمالك ادام الاهلى بحكم العادة

ويطلع عمرو آديب فى القاااهرة اليوم

وكأنه بيكلم نفسه .. حصلك ايه يا عمرو ؟

بيوصف حاله وبعدها يمسك فى بركات

صباح الدماغ الجامدة يا عم الزملكاوى

.

ملحوظة : مش عاوز المدونة تقلب أهلى وزمالك وخناق وضرب انا سايب الفيديو هنا لمجرد تغيير الجو بس يعنى وقد اعجر من بعذر واللى هيدخل يجيب سيرة الاهلى والزمالك هيتعلق على باب المدونة بعون الله ... وسمعنى سلام هيهيهيهيهييييييي شوفت بركات ؟

زمااااان زيى النهارده

زماااااان زيي النهارده وفى انتظار الهلال
حالة طوارئ من بداية اليوم لطفل صغير
يوم الرؤيا ده كان يوم مشهود من صغرى وطفولتي المشردة وده يوم من ليالي رمضان نور في ذاكرتي أوى بحلول رمضان و حبيت اسيبه هنا وللعلم بالشئ هيكون اطول بوست فى حياتى بس بجد انا حابب تفاصيله اووووى

بداية يوم عادية جدا بمحاولة تسلل عشان اعرف الفانوس اللي بابا جايبهولى شكله إيه اصل بابا كان بيسيبه مفاجأة لحد الرؤيا بس دايما كان بينسى القاعدة الأولى في المفاجآت لما تتعامل مع شخص بيحب يعرف كل حاجه متقولوش انك عامله مفاجأة عشان حرام تجيبله الضغط والسكر :) ودى كانت كل سنه بينتهى بأيد مسكانى وأنا بحاول اطلع فوق الدولاب

استعوض ربنا وأجرى على التلفزيون اللي مكنش بيجيب أيامها غير الأولى والتانية والرابعة متشفرة تشفير ارادى نظرا للبرامج المملة اللي بتقدمها بس في اليوم ده هي شباكي عشان اعرف البلد عاملة إيه في رمضان وياريتنى ما كانت بتجيلى الفكرة دى كل سنه تلاقى الشعب كله أدام الكاميرا بيشاور ببلاهة عشان قرايبه يشوفوه وواحد يطلع يقول بحييى أهلي والأقارب والأحباب وبهنيهم بقدوم شهر رمضان وربنا يجعله ...... الخ ... تانى فكرة تبوء بالفشل في اقل من ساعة ووقت الحاجات الحماسية لسه مجتش في انتظار بابا يروح يمين ولا شمال بقى ... هه إيه يا بابا ؟ البيت أحلو النهارده يعنى ؟ وبعد فترة انتظار وأنا على أحر من الجمر بابا يقرر ينزل اخيررررررا... هتوحشنى يا بابا متتأخرش ها ؟ جرررررررررررررى بقى البس ونكمل مهمتى... أصلى كنت أنا وصحابي بنتسلل كل يووم خارجين من البيت عشان نعمل شراشيب للعمارة وطبعا السطح ممنووووع بس هع على مين بقى ؟ هه نتوكل على الله قبل ما بابا يجيى .

خلصنا الشراشيب وارجع البيت اظبط نفسى يدخل بابا وطبعا بما انى لسانى مبيسكتش لازم اروح اسأله عن رأيه فى شراشيب العمارة لما يقولى كويسة مع نظرة شك متفحصة ألف النحية التانية زيي ما يكون وشى شفاف وبابا هيعرف انى طلعت السطح و أبقى نفسى أقوله أنا عاملها وادينى عايش اهو بس الواحد يلم لسانه خلينا نقضى رمضان بدون اصابات ... بابا مش هنبدأ نجهز الفانوس ؟ ( الكلام ع الفانوس الكبير اللي بيتعلق بره البيت )طيب ارتاح شوية ونقوم نعمله .. طيب

مش هنبدأ نجهز الفانوس ؟ وتستمر الاسطوانة بلا انقطاع بتكرار الجملة مرة كل 6 ثواني لحد ما بابا يبقى هاين يدينى بالفانوس فى دماغي... أتلم أنا و اخواتى حوالين بابا وماما بالدعم المعنوي وإمداد الجيش بالعصا ير والسندوشتات لزوم المعركة .. وطبعا خد بقى دبوس اعمل مكنش قصدي وأحطه فى صابع اخويا ونفس الدبوس اخويا يعمل مشفهوش ويدق على صابعى بالشاكوش بدل الدبوس وتلاقى اخويا بيدق الدبابيس الضغط وأنا ماشى اخلعها وراه عشان مكنش ويرضى يسيبنى امسك الشاكوش :)

وأخيرا يتعلق الفانوس وأخيرا ميعاد الفانوس الصغير مليش فيه قالوا رمضان بكرة قالوا بعده هشوف الفانوس النهارده .. فى السنة اللي بحكي عليها كان أجمل فانوس فى حياتي مكنش بيغنى الفانوس كان بشمعة كان ليه معنى بجد وكان درجة من درجات الأزرق ورغم انى مكنتش أيامها واخد بالى انى هكون من عشاق اللون الأزرق بس حبيته أوى وارتحتله اخدته وفرحت بيه أوى وجرى على اوضتى أجربه ورغم ان بابا كان مديني شمعة واحدة عشان مبهدلش الحياة بس أنا كنت عامل حسابي وسايب دستة فى اوضتى :) كنت اولع الشمعة وأحط الفانوس واسيبه ينشر فى الاوضة نور ازرق صافى مع إحساس بالدفا من قربى للفانوس ومش عارف ازاى نور الشمعة دى كانت بتدفينى رغم إننا كنا فى عز الشتا وكنت بحس ان الفانوس ده دوامة أفكار كان بيحرك خيالي بطريقة غريبة .. كنت بحبه أوى وفى وسط زحمة افكارى مع فانوسي العجيب اسمع الصوت المميز للبيت عندنا

ميعاد النووووووووم فى مدارس الصبح ... جرررررر أنا عاوز أكمل لعب

مهو يا ماما .... كل سنه أصلا مكنتش بلحق أكملها بلاقينى بتزق زق لحد ما أوصل السرير وقبل ما أخد نفسى عشان اعترض ألاقى اللحاف بقى فوقى وبعدها كان كسلى وإرهاق اليوم بيتكفل بالباقي خخخخخخخخخخ

السحووووور ... مهى شغلانة بقى تقولولى نام انام تقولولى اصحى اصحى ؟ طيشة انا فى البيت بقى ؟ طب وادى نومة.. اضرب اللحاف على دماغي وأكمل وفجأة أحس بهوا جاى من كل حتة .. فى إيه يا جدعان ؟ واتاري اللحاف اتشال وانا بقيت فى الشارع :) واتزق اتزق ( انا شوفت السيناريو ده فين قبل كده ) لحد ما اوصل للسحور .. طبعا مببقاش شايف ايه اللى بيحصل ادامى ولا حاسس بطعم حاجه اساسا بس مكتوبلى ادخل المعركة .. وانا قايم بقى : سندوششتاتك فى التلاجة متنساش تاخدها الصبح .. نعم ؟ بكرة رمضان يا ماما كل سنه وانتى طيبة !!! .. لا مهو بابا قال متصومش عشان مش هتقدر وهتتعب لان جسمك ضعيف ... كلمة منى كلمة منهم خلاص قفلت معاهم على وعد انى أصوم من السنة اللى بعدها اللى هيا تانية ابتدائى ... مممممم أجرى على فانوسي امخمخ معاه هنعمل ايه فى الموقف الجديد ده ؟ ... وبعد مدة متتعداش 10 دقايق جتلى فكرة من افكارى العبقرية .

تانى يوم فى واخد أكلى ونازل وكمااان زمزمية المية ونازل فى هدوء .. يدوب انزل تحت وافطر الشجر بالزمزمية ومسيبش قطة فيكى يا شارع غير لما تاكل مع الاعتذار طبعا للى فطرتهم ونظرة لوم عن كونهم مش صايمين :) .. ارجع البيت أكلى انا جاهز او شبه جاهز فى حدود 3 ونص أخد الأكل وادخل اسيبه تحت السرير وأروح اغسل ايدى واحمد ربنا واللهم دومها علينا نعمة واحفظها من الزوال :)

نرجع لقبل دلوقتى بشوية سنه واحدة كمان ايووووه ستوب هنا محطة مهمة اوى فى حياتى رمضان 2007 كان اعادة لمعانى كتيرة فى مضان كنت فقدتها فى السنتين تلاته اللى قبل السنه دى .. فى رمضان ده اول توجيه ليا لعمل حبيته اوى .. فى الاول مكتش فاهم بس بعد المشاركة حسيت احساس غريب مش عارف هعوضه تانى ولا لأ بس انا حسيت احساس جديد عليا واتجاه تانى وتفكير تانى وحاجات كتير فضلت منورة فى تفكيرى لحد دلوقتى ... رمضان 2007بداية التعارف الحقيقى بأجمد شباب فى الحياة و جو غريب مكنتش عارف اصنفه وقتها كوكتيل شخصيات يربطهم حب الخير وبس ... كل واحد بتفكير كل واحد بنظام كل واحد بتعامل بس كمجموعة متناسقة ومترابطة بشكل غير طبيعي ربنا يديم عليهم تجمعهم دايما يارب ... افتكر انى فضلت فترة مستغرب الجو لحد ما بدأت اتعامل واتعلم .. بجد لازم اقولكم شكرا ولسه بكتشف فيكم جديد لحد دلوقتى .

اما بقى عن رمضان ده فربنا يستر شكلها هتتقضى زيتون ومشاريع بيتزا فاشلة وطبخات غريبة وربنا يستر ويعدى على خير :)

كوكب زحل

كوكب زحل

كوكب يوحى بحاجات غريبة

متناسق بحد الجمع بين المتناقضات

بسيط لدرجة التعقيد

حتى اسمه

بشوفه بنظره غريبة

ز ح ل

.

ز : توحى بالهدوء وتخلينى افكر انه اكيد يخفى اكتر مما يظهر

ح : يحسسك بالجنون والانطلاق

ل : يضفى اللمسة الاخيرة من الكلمة ويجمع ما بين متناقضات الهدوء والجنون

.

يكفينى صفائه ... يكفينى صدقه

.

سريع اوى فى كل حاجه ولا انا بيتهيألى ؟

.

ملحوظة مهمة جدا : مش عاوز حد من الاخوة بتوع الفلك يضايق نفسه البوست مش فضائى بالمرة :)

احساس غريب

مش غريب ابدا انك تفتكر حاجه حصلت

.

.

بس غريب انك تفتكرها وانتا مشفتهاش

.

.

احساس عجيب بجد

.

.

فلاش تفاصيل عدى بسرعة

.

.

فجأة شوفت تفاصيل محصلتش ادامك

.

.

او يمكن حصلت

وانتا مشوفتهاش فى زحمة التفاصيل

.

.

بس ياترى ليه نورت فى دماغك فجأة بالقوة دى ؟

انا هنا مش بعيد

.

.

كتير اوى النجوم فى السما

.

ولكن ......

هتعدى

مين قال انها مش هتعدى

ضاقت عليا ؟ ..طب وماله ؟

هنط وامسكها

ونتفاهم

عاجبها عاجبها ..مش عاجبها ؟

يبقى نتفاهم

يكفى

ويبقى لى أمل الرحيل

الواجب المتأخر

أولا بتقدم بالشكر لأستاذ طارق غنام اللى مرر اليا الواجب ده رغم المشاكل النفسية اللى بتجينى مع مجرد ذكر كلمة واجب :)

وبعتذر عن تأخرى طبعا لمدة ..... مممممم والله ما انا فاكر بس هما كتير يعنى

المهم .. المفروض منى انى اقول 6 حاجات محدش يعرفهم من اول مرة يقابلنى فيها وكمان امرر الواجب ده ل 6 اشخاص ( هو اشمعنى 6 يعنى ؟ .. ما هو سر البجبج ؟ )

1) انا قنبلة فوضى بتنفجر فى قلب المكان متعرفش ايه بتاع مين ولا ايه اللى مرمى فين ( ايموشن مكسوف )

2) رغم هدوئى الا انى عصبى جدا واسرع واحد بيهدى فى الحياة ده إن مضحكتش فى اثناء نرفزتى يعنى :)

3) مبحبش الهدوء الممل بكل انواعه .. ممكن الهدوء المتأمل لما يكون فى حاجه تستحق انما الهدوء والروتينية مبنتجمعش فى مكان واحد

4) مبحبش اللف والدوران القاعدة اللى اعرفها ان اقصر الطرق المستقيمة بين نقطتين هى الخط المستقيم ومبعرفش اسكت للاسف على حاجه مش عجبانى

5) بحب الرموز جداااا ... بحب الذكريات فوق المعتاد .. واحد من اللى بينطلقوا تحت المطر وبيعشقوا البحر - رغم انى مبعرفش اعوم - بس بحبه :) ... وللنجوم اعتبار خاص فى خيالى

6) بحلم اعيش منطلق طول ما انا مش غلط وبناءا عليه بعمل اللى انا عاوزه فى المكان اللى انا عاوزه واللى مش عاجبه يخبط ....... فى ال .....

ممممممممممم جينا لتمرير الواجب ل6 اشخاص

1) اختار المنطلق الى اللانهائية وما بعدها .. سوبرنوفا او زحل الفلكى عادى يعنى

http://supernova-awy.blogspot.com/

2) اختار اللى بتقول كلام كتير من غير حروف .. روزاليا

http://rosealia29.blogspot.com/

3) صاحبة الاحلام اللى معدية السحاب .. فوكيرة

http://18goosebumps.blogspot.com/

4) نؤا الدماغ محبة البيتزا اللى نفسى تتعلم العربى

http://for-rent-life.blogspot.com/

5) منمونة وصباح الافترا ( حزام اسود كارتيه بقى )

http://manmona-aboutlife-wkf.blogspot.com/

6) عفريت العلبة البرمبرمبو بروفيشنال احمد محمود او تشيلو .. اختاروا اى يعجبكم بقى المهم ان دى مدونته

http://3afreet-el3elba.blogspot.com/

يلا يا جماعه مطلوب منكم تقولوا 6 حاجات محدش يعرفهم عنكم وكل واحد يمرر الواجب ل 6 اشخاص

هييييييييييي خلصت الواجب :) ... مرة تانية بشكر استاذ طارق وبعتذرله عن التأخير

بيان هام

أيها السادة المواطنون نأسف لقطع ارسالنا لإذاعة هذا النبأ الهام : تم اختطاف موبايل الحاج شيكو وولده امس الموافق 21/7/2008 ولم تعلن اى جهة عن مسئوليتها عن ارتكاب الحادث هذا وقد اعلن مصدر امنى مسئول ( الحاج شيكو نفسه ) ان جهازه قد التحق بالخدمة منذ ما يفارب العامين وكان من المقرر انهاء خدمته فى 1/8/2008 اى بعد ما يقارب من 9 ايام من موعد اختطافه ندعو الله لاهله بالصبر والسلوان

.

.

عارفين ايه هى الخسارة بجد ؟

80 لحظة وابتسامة و 80 ذكرى محفورة فى خيالى

80 ريسيفيد مسيدج كل واحدة منها ليها الف معنى بجد

للاسف ملحقتش اسيفهم على الكمبيوتر

بجد مفتقد انى اقراهم كل يوم قبل ما انام

واضحك معاهم وكأنى بفتح صندوق ذكرياتى

عااااااااااا بقى

.

.

.

بس متقلقوش انتوا عارفين حب الاذية اللى بيتحكم فيا يعنى كنت عال حساب المواقف اللذيذة دى واللى اخده ميعرفش انه كان اسهله يقتحم قلعة صلاح الدين وسط جيوش شرطة السياحة .. وكل خطوة على الموبايل هيطلب باسورد ومش هيعرف يعمل فيه اى حاجه .. امال يعنى هسيبله الامور سهلة كده ؟

.

.

.

ايها السادة المواطنون عدنا مع تصريح من الحاج شيكو اطال الله فى عمره واكرمه بدوام الصحة والعافية : الرقم مستمر كما هو وربنا يخليلنا شبكة ( ام نبيل ) التى ابدت تعاونا كبيرا وملحوظا الرقم على شريحة جديدة بدلا من الشريحة الفقيدة.. اكرمهم الله واكرم السيد المسئول

هى من فاقت النجوم

عارفين ايه هى النجوم؟

النجوم هى نور صافى كله دفا وجمال

تملى سواد الليل ضحك ولعب وجنون

تنشر شعاع الشمس فى غيابها

ويشق نورها ضلمة قلوب الناس

وتقولك لسه الأمل موجود

تحلم معاك حلمك وتجددلك معانيك

ونجمايتى تفوق كل النجوم

نجماية فى السما عالية

ليها مساحة خاصة فى جزيرتى

جزيرتى اللى مدخلهاش غيرى وغيرها

مساحة حدودها قلب نجماية بتدى من غير حدود

تحس بنورها يلمس جنون قلبك

تسمع صدى همسه يخبط فى احساسك

ويسيب وراه نهر دافى رسمته احلامك

اسهر معاها واحكيلها تفضل وتسمعنى

تهزنى من جوه واضحك بصوت عالى

وانام واسمعها بتهمس خايفة تصحينى

واجرى الصبح اناديها خايف تضيع منى

ابص الاقيها واقفة بتضحكلى

اضحك وابدأ معاها يومى

واضحك كمان من اللى بيقلق

من انه يشوف النجوم فى عز الضهر

على هامش التدوينة :

زماان كان فى طفل بيحلم يلمس النجوم ويفضل ينط يحاول يلمسها يتعب وينام ويصحى الصبح يدورعليها عشان يكرر تجربته اللى فشلت امبارح ... يروح ميلقيهاش !! يستغرب اوى مهو سايبها هنا امبارح بالليل راحت فين طيب ؟ ... وتقفل دماغه بقى وعاوز يعرف مين اللى اخدهم ولحق يلم كل دول امتى ؟ واللاهم من كل ده : هو ازاى طال النجوم ؟

دلوقتى بس عرف انه مش لازم يلمسها ويشوفها عشان تكون موجودة

مجرد سراب

كانت مجرد فرصة

انى اشعر بوجودكم

عارفين ؟

وجودكم مزيف .. بس كنت محتاجه

عارفين كمان ؟

صعب أوى إنك تتعايش مع السراب

والأصعب إنك تمشى معاه لأخر الطريق

ويعتذرلك فى النهاية عن عدم وجوده

حلم واتحقق

جميل اووى انك تحلم والاجمل ان حلمك يتحقق
وتحسك شوفت التفاصيل دى قبل كده

شوفتها فين قبل كده ؟

شوفتها زماااااان
زمااان لما كنت بحلم بيها صغيرة وهادية وشقية
وكأن الدنيا كلها بتنور بضحكتها
وتجرى وتضحك
وتسرح بأفكارها فوق السحاب
وتحلم وتحس انها اتحطت وقتها وسط النجوم

اعرفها ؟

ياااااااه ياما لعبنا مع بعض زمان
لعبنا فى خيال طفل صغير
كنا علطول مع بعض لما كان بيبقى لوحده
يعنى تقريبا علطول
شخصية خيالية رسمها عقل طفل
رسمها زيى ما يكون بيرسم بسمة غابت عنه وقتها
وتعدى افكار وافكار وتفضل الفكرة موجودة
سايبها فى صندوق ذكرياته

نرجع لارض الواقع ؟.

اقدر دلوقتى اقول : انه حلم واتحقق

ملحوظة : محدش يعتقد انى كنت بحلم بالحب بمعناه العاطفى والمنتشر دلوقتى وانا لسه طفل :) التدوينة عن معنى اخوى اكثر سموا من الحب بمراحل

يا جدعان عيب كده ميصحش

يا جدعان حد يحوش الناس دى عنا
الدكاترة زيى ما كانوا مكنوش بيشفوا طلبة من فترة
وكل امتحان علقة طبق الاصل لا زادت قلم ولا قلت قلم

وتشوف نموذج الامتحان العجيب بقى

السؤال الاول : بالتعويض عن دماغ حضرتك ببطيخة جاوب على الاسئلة التالية :

طاخ طاخ طاخ وخبط ورزع وقطع غيار بنى ادمين بتترمى

وتحس كده ان الاسئلة ملهاش طعم ولا لون
والسؤال مش بيانله وش من قفا
ما انا عارف الاجابة بس ايه السؤال اصلا ؟
يا جدعان الدكتور فين ؟
وايه اللى هيجيب الدكتور هنا يابنى
اهلا بك فى مصر الدكتور فى بيتهم ملوش دعوة دلوقتى
مممممم طيب ايه؟؟
ما انا مش هسيب الورقة فاضية !!
عيب بردو ميصحش .. وتبدأ سلسلة ابداع المصريين فى التأليف

واسلوب التلطيش اللى طبعا مبيخلاش منه امتحان وهو ببساطة تكتب كل اللى تعرفه عن المادة والدكتور يشوف الجزء اللى يعجبه وياخده ويسيب الباقى

السؤال التانى : مع كامل احترامنا سمع الكتاب من صفحة 20 السطر التالت الى 39 السطر التاسع مع العلم انهم 3165434 حرف

السؤال الثالث : الدكتور كان بيقول ايه فى محاضرة يوم 29/3 ... الكلام ده مش فى المنهج يا جدعان ده كان بيحكى فى موقف حصله ... مش مشكلة لازم تنتبه لكل كلمة الدكتور بيقولها ... ميصحش بردو تحفظ تاريخ حياته المشرف

اهلا بك فى مرحلة اعداد ماكينات الطباعة المصرية
حسبى الله ونعم الوكيل .
وعدت انى هعمل اللى عليا للاخر .. يارب قدرنى واكون اد وعدى

رسالة وموصلتش صح

وقت ما حسيت انى لوحدى وانا وسطكم .. صدقونى

وقتها بس عرفت انى لازم اكون لوحدى

افتكروا انى رسالتكم و ان انتوا مقدمتوهاش صح

برمبرمبو بروفيشنال وتجاربنا العجيبة

بعيدا عن طبخة البرمبرمو المعتادة حصل موقف غريب فى يوم كده ما بينى انا واحمد اللى فوق ده وعلى غير العادة اتفاجأت بيه بيه بيتصل بيا فى حدود الساعة واحدة بالليل تقريبا وبيقول : محمد تعالى دلوقتى عايزك ...... مممممممممم الدخلة دى لا تبشر بخير ربنا يستر يارب يا معين واقطع المسافة دى كلها واروحله البيت وامرى لله شديت لجام الجمل وعلى البيت اللى يبعد عنى حوالى 50 متر ... حسيت كده خير اللهم اجعله خير حاجه بتقولى بلاش تروح وقفت ادام الباب ومش عارف اخبط ولا لا .... المهم لقيتنى جوه واثار حرب الكويت فى الشقة ... خير يا احمد دخل عندكم حرامى ؟ لا ...... الحكومة كبست عليك ؟؟ لا ..... ايه طيب اسباب الدمار العجيب ده يا احمد ؟ اوعى يكون برمبرمبو انا مش مستحمل ابوس ايدك .. ابتسم ابتسامة شيطانية وطار على المطبخ

استر يارب من ابتسامات احمد واللى بتعمله فينا اخر مرة ابتسم كنا العمارة هتفرقع بينا .... دخلت لقيت التلاجة نقلت بره ..... ااااااااه الموقف ده انا عارفه كويس ... ودعيت فى سرى بضمير وسألته : احمد انتا طابخ ايه النهارده ؟ على فكرة الامر ميختلفش كتير لان احمد وهو بيطبخ بيحط كل حاجه موجوده فى التلاجه بس قولت افهم بردو عشان احاول استوعب ...... لقيت احمد بصلى بصة اينشتاين بتاعته دى وعنيه بتلمع وافكاره السودة بتجرى فى عنيه فكرة ورا التانية ... بيتزاااااااا .

اخ كنت بحبها والفكرة انى جعان ..... مممممم اعمل ايه ؟؟؟؟؟ اثبت متجريش
بيتزا ؟ يالهوى يالهووووووى يالهووووى
اعمل ايه يارب ؟ ربنا يستر ..
صلى على النبى وكل يا عم خير ... اكل ايه اكل ايه اكل ايييييييييه ؟
بيقولك بيتزا يا عم الحاج

دى شوية افكار عدت فى دماغى بسرعة ويظهر احمد قراها فصحيت من افكارى على صوته بيقول : مش عاجبك متاكلش .... لا لا لا مش عاجبنى ايه ؟ هاكل هاكل .. قول لا قول لا قول لا قول لا .... بصلى تانى هاكل يا احمد خلاص

بدأت اتفقد ارض المعركة وابص على المكونات اقصد التلاجة اللى اتنقلت على ساحة المعركة مممممم احمد هو العجينة جاهزة صح ؟ لا يا محمد انا اللى عاجنها ... يالهوى يالهوى يالهوووووى هو اللى عاجينها يا خراب بيتك المستعجل يا شيكو هو كان كام ؟ 122 ؟ لا لا مش ده الرقم ده بعد ارتكاب الجريمة لو مت ولا حصلى حاجه لا انا عايز التانى اللى بيلحق الناس قبل ما تموت يا نهار ابيض الصدمة نستنى .... مش مشكلة اكيد هما هيعرفوا .. اه هيعرفوا ... استرها والنبى يارب وعديها على خير انا كان ايه اللى جابنى بس ؟

لا وتشوفوا الفخر بقى وهو بيطبخ يا سلام تقولش بيبنى العرم الرابع ؟ ويهز دماغه ومتسلطن اوى .. بتهز دماغك على ايه ؟ 3 شباب من خيرة شباب مصر هيروحوا هدر فى حادثة بيتزاية والباشا واقف بيغنى ... اه نسيت اقولكم اننا تلاته عشان اسلام اخو احمد معانا ..... احمد ؟ حتى يطمئن قلبى بس : هو ايه المكونات بالظبط ؟ .... ده سر المهنة يا باشا . اه شغال اللهم لا اعتراض

وعدت اللحظات ورا بعضها وحاسس ان الكارثة قربت ... دخل اسلام يجرب واحمد مطلعها من الفرن وعنيه بتلمع بنظرته المعهودة ( ايوه النظرة الشيطانية بتاعته دى لما يوشك انه يموت حد ) المهم لقيت الواد خارج بيطوح طبق الاصل علقة البرمبرمبو لا زادت قلم ولا قلت قلم ... دخلت انا وراه والدخان طبعا مالى الحياة جيت ادوق .. وقفت على متمدش ايدك ... حاضر يا عم متزوقش انا بس قولت وقوع البلاء ولا انتظاره .. على العموم شغال ربنا كتبلى عمر جديد ..... واقف بقى بيقطع وعلامات النصر على وشه ومستكيف اوى وانا قريت فى سرى القراءن كله وانا واقف .... اخدت جزء من الوليمة وعلى غير العادة بدل ما اقول ( بسم الله الرحمن الرحيم ) قولت ( يارب اغفرلى لو كنت اخطأت وثبتنى عند السؤال ) هجوووووووووم بعد اول هجمه مفيش اى ردود فعل على وشنا احنا التلاته ..... مممممم هو اليوم مش معدى من اوله انا عارف ... تانى هجمه بقى بدأ الموضوع يبدأ يتفهم ونحاول نلخص احاسيسنا المعوية الرهيبة اللى حسينا بيها واحمد بدأت علامات الانتصار تظهر على وشه ... هو انتا طبخت من اللى تحت الحوض يا حاج احمد ؟ ... بصيت لاسلام : شغالة ... اه شغالة هى مش طعمها بيتزا بس شغالة ..... والله مكدبش السادات لما قال ان شعب مصر شعب ياكل الزلط ده كان يقصدها حرفيا على فكرة :)

بس وبعد ما اكلنا بقى بدأت علامات العبقرية تظهر علينا .. اربع ساعات غباء متواصل بعيد عنكم وعن السامعين ربنا يكفيكم شره وشر البرمبرمبو وشر طبيخ احمد محمود ( تشيلو ) اعتقد اثارها واضحة فى الصورة فوق


لا بجد رغم افتكاساتك كانت جامدة يا باشمهندس وابقى كررها تانى والحمد لله خلاص خدنا مناعة من طبيخك المفتكس .. ويخربيتك اللى يزعلك يا راجل .

بجد كان يوم جامد مع البرمبرمبو بروفيشنال احمد محمود وزميل الكفاح اسلام اخوه وحبيت اسجله هنا وافضل فاكره علطول وقشطة يا تشيلو يا جاااااااااااااااااامد

شوية تفكير بالمشقلب

صح صح كده انا فهمت ... ازاى تاهت عنى دى ؟
كان لازم افكر كده من البداية
هو ده التفصيل اللى ناقص ومخلينى مش فاهم
هى دى النقطة السودة الوحيدة اللى كانت فى الموضوع
واللى تعبتنى اوى وانا بدور عليها ومكنتش لاقيها
كان لازم افهم من البداية انى بدور فى الاتجاه الغلط
وان النقطة السودة من اخر مكان ممكن يجيى فى بالى
من مصدر الضوء نفسه ... متستغربش ومتكدبش نفسك
المنطقى ان مصدر الضوء يعمينى عن نقطة معينة
مصدر الضوء اللى لغى كل النقط السودة ادامى
احتفظ لنفسه بنقطة سودة واحده
تفصيل واحد يكشف كل التفاصيل اللى فاتت
بس بلون تانى وشكل تانى غير اللى كنت شايفه

لازم افتكر انى لما اقلب المواقف المشقلبة هتتعدل

ترجمة لشوية تهييس

هدوء مريح مسيطر عليا فى المرحلة دى .....هدوء هز كيانى كله وفوقنى لحاجات كتير
بداية مرحلة جديدة بطريق تانى ....مرحلة جديدة وتجربة قررت اعديها
احساس جديد مش عارف حتى انا بدأت احسه من امتى ؟ .... افتكر بس ان الدنيا كانت أكثر صخبا من المعتاد فى الفترة الأخيرة وبعدين ............ والله ما انا عارف وبعدين ايه فجاة كده كل حاجه حلت نفسها وكل حاجه استقرت وبدون مقدمات .... مهو انا لازم افهم بردو مينفعش كده يا اخوانا

انا نفسى افهم انا ايه اللى بيحصلى ده يا ربى ؟
حاولت افهم ..بصيت حواليا .. رغم انى كنت بحاول اركز بس ابتسمت ابتسامة عريضة غصب عنى لما فكرت وسألت نفسى انا بدور على ايه حواليا ؟ يعنى النهارده هشوف الناس بزعانف ؟... ركز ركز ...حاولت اركز تانى بس رجعت ابتسمت ابتسامة اكبر اصلى حسيت انى لاول مرة من فترة طويلة بحس انى شايف من غير نقط سودة ...دلوقتى شايف حاجات كتير بشكل مختلف

احساس بمعنى الهدوء بجد

بس ياترى هل يليه العاصفة المعتادة ؟

جزيرة أحلامى

كم حلمت أن أكون هنا
أداعب رمالك وأهمس إلى أوراقك الحالمة

أغلق عيناى وأنطلق محلقا وسط السحب
يتخللنى شعاع من نور فأشعر بإنطلاقه بداخلى
اتركه يتخلننى ويصبح كياننا واحد
أشعر بشاففيته وغموضه
الامس المياه فأحكى لها عن اسرارى

وأتوه فى وديانك فاهتدى بالنجوم
نجومك التى تنظر باستحياء من خلف سحبك الدافئة
وأعود من أين كنت فأنام وسط الهدوء

وأنتظر الصباح كى أنطلق مع طلوع الفجر
وأختلط بشعاع شمسك الدافئ
فأمسك به واكتب به الحانا وكلمات

يأتى المساء فأجلس على شاطئك
ابتسم واجول فى بحر احلامك
ويظل نورك بداخلى

كم اشتقت اليك ايها المكان
وها قد عدت من جديد
ما زال لدى الكثير لاكتبه لك
ولكن يكفينى القول انى قد عدت من جديد

بداية جديدة لكابوس مش جديد

وقفت ساكت فى موقف مينفعش فيه الا السكوت

وقفنا نتفرج واحنا مذهولين
كنت بتفرج على حلم افتكرت انه بداية جديدة
بس للأسف حلمى كان بداية جديدة لكابوس مش جديد

كان كل حلمى انى احس اننا اتجمعنا ولو مرة
حلمى البسيط اتحول لكابوس

كابوسى كان حاجز مش عارف اعديه
صوتنا مش مسموع ومفيش غير السكوت
واللى قدر يعدى مش قادر يقول

سكت الكلام جوانا خلاص
هدووووء شق السكون وكسر حلم كنت بتمناه
بجد مش هقدر اوصف
بس محتاج اقول ان الحلم كان بداية الكابوس

رسالة حب وأخوة

ذكريااااات كتير بنعدى بيها فى حياتنا
ذكريات لا تنسى بجد
هنيجيى فى يوم ونبتسم ونقول : يااااه كانت أيام
حبيت اتوقف النهارده عند محطة بجد متميزة فى حياتى
اخويا الكبير محمد جودة
ذكريات كتير عديت بيها معاه رغم انى معرفتوش من زمان
بس من أول يوم عرفته وهو بنفس طيبته وهدوءه

ذكريااااااات

افتكر لما كنا نطلع على البحر والدنيا برد
واحس انى هطير من الهوا وامسك فيه كويس
مهو مش كل الناس اللى بتطير
واخد منه حكمته وجنونه
وحبه الدافى وانطلاقه

ذكرياااااااات

رغم مقدماته الطويله وردوده الهادية
بين قوسين اللى تغيظ احيانا
بس كنت بستمتع بالكلام معاه
واقعد احكى معاه فى كل حاجه
وانسى انى عندى محاضرة الصبح
واسيبه وارجع البيت جرى عشان الحق انام

ذكرياااااااااات

افتكر معاه ضحكة صافية طالعة من القلب
ورسمة فى مرايا افكارى لكل شىء جميل
حاجات كتير حسيتها معاه ومش هنساها

ذكرياااااااااات

حبيت بس اسجل جزء من اللى بيدور جوايا
لشخص بجد مهما اتكلمت مش هوفيه حقه
بجد شكرا لقيتك معايا لما كنت محتاجلك
وربنا يديم علينا تجمعنا فى الخير يارب

لحظة بداية

على البحر والرؤية تقريبا منعدمة ومش شايف غير ظلال بسيطة على ضوء خافت جاى من بعيد مش عارف مصدره ... بس اكيد انا على البحر حاسس بيه حواليا....يمكن ده خلانى اركز اوى مع الصوت .... سامع صوته بيهز حاجات جوايا صوته اللى اتعودت اسمعه وكأنه بيواسينى وساعات بسمعه على انه بيغنى معايا هو هو نفس الصوت بس صداه النهارده مختلف شوية

بدأت عينى تعتاد على الاضاءة الخافتة واشوف بعض التفاصيل ... وبدأت افكر فى الشكل العام للموقف اللى انا فيه ... كان جزء بسيط منه انا شايفه على الضوء الخافت والجزء التانى رسمته فى خيالى

حسيت ان البحر النهارده بيفكرنى بذكرياتى .... حسيت اوى بعناده وهو بيخبط فى الصخور ويرجع يجرب مرة تانية ... حسيت بقوة صوته ... عجبنى اوى قوته وعناد الموج وصبره ... افتكرت ساعتها استغراب الناس عليا زمان وهما بيسألونى انا اخد طبع العناد ده من مين ؟

ابتسمت وبصيت للبحر تانى وركزت مع صوته اللى بيوحى بالهدوء

وعدى عليا فلاشات من حياتى ... افتكرت احلامى الصغيرة واد ايه كانت صعبة وانا صغير وافتكرت كل ابتسامة مشفقة من الاكبر سنا وافتكرت كمان احساسى بعد كل نجاح فكرة من افكارى الصغيرة ..... ساعتها حسيت انى بجد اتعلمت منه كتير

ساعة تقريبا من اجمل ما يمكن فى حياتى حسيت فيها بأجمل معانى فى حياتى وجددت نشاطى وقررت انى ابدأ احاول من جديد مهما كان اللى بيحصل حواليا ومهما خسرت بالتأكيد فى مكاسب لسه فى علم ربنا

حبيت اسجل اللحظة دى كلحظة بداية من جديد ... بداية جديدة لحلم مش جديد

حلمى انى اكون أنا