عارفين ايه هى النجوم؟
النجوم هى نور صافى كله دفا وجمال
تملى سواد الليل ضحك ولعب وجنون
تنشر شعاع الشمس فى غيابها
ويشق نورها ضلمة قلوب الناس
وتقولك لسه الأمل موجود
تحلم معاك حلمك وتجددلك معانيك
ونجمايتى تفوق كل النجوم
نجماية فى السما عالية
ليها مساحة خاصة فى جزيرتى
جزيرتى اللى مدخلهاش غيرى وغيرها
مساحة حدودها قلب نجماية بتدى من غير حدود
تحس بنورها يلمس جنون قلبك
تسمع صدى همسه يخبط فى احساسك
ويسيب وراه نهر دافى رسمته احلامك
اسهر معاها واحكيلها تفضل وتسمعنى
تهزنى من جوه واضحك بصوت عالى
وانام واسمعها بتهمس خايفة تصحينى
واجرى الصبح اناديها خايف تضيع منى
ابص الاقيها واقفة بتضحكلى
اضحك وابدأ معاها يومى
واضحك كمان من اللى بيقلق
من انه يشوف النجوم فى عز الضهر
على هامش التدوينة :
زماان كان فى طفل بيحلم يلمس النجوم ويفضل ينط يحاول يلمسها يتعب وينام ويصحى الصبح يدورعليها عشان يكرر تجربته اللى فشلت امبارح ... يروح ميلقيهاش !! يستغرب اوى مهو سايبها هنا امبارح بالليل راحت فين طيب ؟ ... وتقفل دماغه بقى وعاوز يعرف مين اللى اخدهم ولحق يلم كل دول امتى ؟ واللاهم من كل ده : هو ازاى طال النجوم ؟
دلوقتى بس عرف انه مش لازم يلمسها ويشوفها عشان تكون موجودة
هناك ١٠ تعليقات:
انت دخلت عالم التدوين الى بجد النهارده
بالبوست ده
من وجهه نظري ...
البوست بجد حــلو فوق الوصف سواء من ناحيه الاحساس و من ناحيه الصياغه
بجد عجبنى اوى كله على بعضه بكــل تفاصيل تعبيراته
بس اكتر جمله على الطلاق عجبتنى دي
" ويشق نورها ضلمة قلوب الناس
وتقولك لسه الأمل موجود"
متبطلش تدوين ابداااا يا شيكو ... انت عندك موهبه بجد ولسه حتتطور اكتر واكتر
البوست ده احسن حاجه قرأتها هنا
لمؤاخذه يعنى نسيت اقول حاجه
القفله بتاعت البوست فوووووووق الجامده
والي على الهامش تجربه مختلفه
كل واحد فينا له نجمه
يعشق لمسها لكن ما يلمسها
يحس بيها وبضحكها وهمسها
لكن تكون ملكه...مظنش
وحتى لو كلامى ملوش علاقه بكلامك
فأنت قولت حاجات مستخبيه كتيرررررر
والله براوه عليك يا محمد
ابدعت بجد
كنت جايه اسلم واشوف كراكيبك اللى قولتلنا عليها
تستاهل يا بو الزومل
مبسوطه بيك
سلامى
اة ملحوسه
الله يسترك شيل تأكيد الكلمه دى عشان بيمنع ناس كتير تعلق
وبحس معاها انى معوقه
بجد كلماتك شديدة الجمال
رائعه المعنى
تصدق بجد انت ما شاء الله
ممتاز
بوست عجبنى جداا
فوكيرة : الف شكر واخجلتم تواضعنا يافندم .. بجد رأيك دفعة كبيرة ليا ... وحاضر مش هبطل تدوين
ولو القفلة عجبتك اتفضليها مفيش مشكلة ( ايموشن بيطلع لسانه )
شيماء : على فكرة بحب ضمير الملكية جداااا فيما يخص اى حاجه بحسها وهنا ضمير الملكية لا يعنى الامتلاك اد ما يعنى الانتماء .. لما تكون النجمة صديقتك صدقينى بجد هتحسى انها ليكى ..وبجد سعيد جدا بمرورك على مدونتى .. المدونة نورت يا فندم
ملحوظة بقى : مش فاهم الملحوظة الاخيرة فى تعليقك
نهر الحب : سعيد بمرورك جدا على مدونتى ..
شيكو
بوست رائع وكلمات راقيه
تحياتى ليك يافنان
ياريت تزورنى بمدونتى المتواضعة ليك عندى واجب ياريت تستلمه
تقبل تحياتى
ود\مت بحفظ الله
بوست دافي .. إحساسك بالنجوم أبدع مما يكون ..
و كأنك حارسها الأمين ..
دمت لنجمتك .. و دامت نجمتك لك ..
بجد يا شيكو جمييله اوي , عارفه ان ردي جه متأخر بس بجد جميله انا كل فتره بقراها :)
بجد يا شيكو كلامها رقيق اوي و تحسها اوي
إرسال تعليق